नेपाल स्वास्थ्य शिक्षा संघको १८औँ वार्षिक साधारण सभा, राष्ट्रिय गोष्ठी तथा प्रथम मधेस सम्मेलन मधेस प्रदेशको बारा जिल्लास्थित सिमरा कलेज, सिमरामा २०८२ फाल्गुन ६ गते सफलतापूर्वक सम्पन्न भएको थियो। उक्त कार्यक्रम स्वास्थ्य शिक्षा संघका केन्द्रीय अध्यक्ष प्रा. डा. कमल गौतमको अध्यक्षतामा सम्पन्न भएको थियो। कार्यक्रमको प्रमुख आतिथ्य मधेस प्रदेश विश्वविद्यालयका उपकुलपति प्रा. डा. दिपक शाक्यज्यूले गर्नुभएको थियो। यसैगरी, बागमती विश्वविद्यालयका रजिस्टार डा. कुसुमराज सुवेदी, जितपुर उपमहानगरपालिकाका मेयर राजन पौडेल तथा उपमेयर भोला प्रसाद अधिकारी विशिष्ट अतिथिका रूपमा उपस्थित हुनुहुन्थ्यो। कार्यक्रममा नेपाल स्वास्थ्य शिक्षा संघका सल्लाहकार, विशिष्ट सदस्य तथा आजीवन सदस्यहरू सातै प्रदेशबाट सहभागी हुनुहुन्थ्यो। समारोहको उद्घाटन सत्रमा सिमरा कलेजका विद्यार्थीहरूले स्थानीय सांस्कृतिक नृत्य प्रस्तुत गरेका थिए। उद्घाटन सत्रको सञ्चालन संघका महासचिव डा. भगवान अर्यालले गर्नुभएको थियो। सबै सहभागी तथा अतिथिहरूलाई मधेस प्रदेश तदर्थ समितिका अध्यक्ष राम विनय प्रसाद यादवज्यूले स्वागत मन्तव्य राख्नुभएको थियो।
कार्यक्रममा संघका पूर्वअध्यक्ष तथा Journal of Health Promotion का प्रधान सम्पादक प्रा. डा. श्यामकृष्ण महर्जनज्यूले संघले नियमित प्रकाशन गर्दै आएको जर्नलको गतिविधिबारे छोटो मन्तव्य राख्नुभएको थियो। सोही अवसरमा Journal of Health Promotion को १२औँ अंकको लोकार्पण पनि गरिएको थियो। यसैगरी, नेपाल स्वास्थ्य शिक्षा संघका आजीवन सदस्य शर्मिला पोखरेल र शान्ति प्रसाद खनालज्यूले विद्यावारिधि (PhD) सम्पन्न गर्नुभएकोमा संघको तर्फबाट सम्मानपत्र प्रदान गरिएको थियो।
उद्घाटन सत्रपछि प्लेनरी सत्रमा प्रा. डा. सुरेन्द्र गिरीले “स्वास्थ्य शिक्षामा दार्शनिक बहस” शीर्षकमा कार्यपत्र प्रस्तुत गर्नुभयो। त्यसैगरी, keynote सत्रमा नारायणी क्षेत्रीय अस्पतालका वरिष्ठ चिकित्सक डा. चित्रांजन शाहले “Lower Urinary Tract Disease and Solution” शीर्षकमा कार्यपत्र प्रस्तुत गर्नुभयो। राष्ट्रिय गोष्ठीमा डा. हरि मैनाली, योको ओडा थापा र डा. तुलसीराम भण्डारीले कार्यपत्र प्रस्तुत गर्नुभयो। कार्यक्रममा “Curricular Reforms and Opportunities in Health Education” शीर्षकमा प्यानल छलफल समेत सम्पन्न भयो। उक्त प्यानलमा स्वास्थ्य शिक्षाका प्रबुद्ध व्यक्तित्वहरू प्रा. डा. रामकृष्ण महर्जन (विद्यालय स्वास्थ्य शिक्षा विषय समितिका अध्यक्ष), प्रा. डा. ओम बराल (त्रिभुवन विश्वविद्यालय स्वास्थ्य शिक्षा विषय समितिका अध्यक्ष), प्रा. डा. भीमसेन देवकोटा (स्वास्थ्य शिक्षा संघका पूर्वअध्यक्ष) तथा सुधा घिमिरे (उपप्राध्यापक, स्वास्थ्य शिक्षा) को सहभागिता रहेको थियो।
कार्यक्रमको उत्तरार्धमा नेपाल स्वास्थ्य शिक्षा संघको १८औँ वार्षिक साधारण सभा सम्पन्न भयो। सभामा अध्यक्ष प्रा. डा. कमल गौतमले वार्षिक कार्यप्रगति प्रतिवेदन तथा आगामी आर्थिक वर्ष २०८२/८३ को योजना प्रस्तुत गर्नुभयो। त्यसैगरी, आर्थिक वर्ष २०८१/८२ को आर्थिक प्रतिवेदन र आर्थिक वर्ष २०८२/८३ को बजेट योजना कोषाध्यक्ष श्री यादुराम उप्रेतीले प्रस्तुत गर्नुभयो। १८औँ वार्षिक साधारण सभाको सञ्चालन केन्द्रीय सदस्य श्री खेम भुर्तेलले गर्नुभएको थियो भने केन्द्रीय सदस्य श्री सुरक्षा रेग्मी सापकोटाले आजीवन सदस्यहरूलाई धन्यवाद ज्ञापन गर्नुभयो। साधारण सभा सम्पन्न भएपछि प्रथम मधेस सम्मेलन मधेस प्रदेश तदर्थ समितिका अध्यक्ष राम विनय प्रसाद यादवज्यूको अध्यक्षतामा सम्पन्न भयो। सम्मेलनले राम विनय प्रसाद यादवज्यूको अध्यक्षतामा ७ सदस्यीय समिति गठन गरेको थियो।
